2 Keunenks 19
01Dou keunenk Hizkia dit heurde, scheurde hai zien klaaier, dee n bouteklaid om en ging noar t hoes van de HEER tou.
02Hai stuurde hofmeester Eljakim, hofschriever Sebna en oldsten van priesters, altmoal in t bouteklaid, noar profeet Jesaja, zeun van Amos.
03"Dit zegt Hizkia," zeden ze tegen hom. "Dit is n dag van benaauwdens, n dag van straf en schaande! t Potje mout geboren worden, mor kracht om t op wereld te zetten, is ter nait.
04Mor meschain dat de HEER, joen God, woorden heurd het van rabsake, dij deur zien heer, keunenk van Assyrië, stuurd was om God dij leeft te offrontaaiern. De HEER, joen God, mag hom stravven veur dij woorden! Droag doarom n gebed op veur rest van t volk dat overbleven is!"
05Dou keunenk Hizkia zien hofdainders bie Jesaja kommen wazzen,
06zee hai tegen heur: "Dit mout ie tegen joen heer zeggen: 'Dit zegt de HEER: Wees mor nait baang veur wat ie heurd hebben, veur woorden doar dij lu van keunenk van Assyrië mie mit offrontaaierd hebben.
07Want ik, ik zel hom schrik op hoed joagen: bie t minste gerucht zel e vot rechtsomkeert moaken noar zien laand. Doar, op aigen grond, zel ik hom deur t sweerd omkommen loaten.'"
08Rabsake dij vernomen haar dat keunenk van Assyrië oet Lachis opbroken was, ging noar hom tou. Keunenk belegerde op dat moment Libna.
09Mor dou e vernam dat Tirhaka, keunenk van Nubië, oprukt was om hom aan te valen, stuurde hai vannijs bodes noar Hizkia:
10 "Breng dizze bosschop aan Hizkia, keunenk van Juda, over: 'Loat joe deur joen God doar ie op vertraauwen, niks wiesmoaken. Denk mor nait, dat keunenk van Assyrië Jeruzalem nait in handen krigt!
11 Man, ie hebben toch zulm wel heurd wat of keunenks van Assyrië ale landen altied aandoan hebben dij ze verrinnewaaierden? En zol ie t ter den ofredden?
12 Volken dij deur mien veurolders verdisterwaaierd binnen, Gozan, Haran, Resef en t volk van Eden in Telassar, binnen dij sums deur heur goden red?
13 Woar binnen ze bleven, keunenks van Hamat, Arpad, van stad Sefarwaïm, van Hena en Iwwa?'"
14 Dou Hizkia braif lezen haar dij bodes hom aanlangd haren, ging e noar t hoes van de HEER tou en vòlde braif open veur de HEER.
15 Hizkia beedde dou de HEER. "HEER, God van Israël, dij op cherubs troont, ie allenneg binnen God over ale keunenkrieken van eerde. Ie hebben hemel en eerde moakt.
16 Leg joen oor te lustern, HEER, dou joen ogen open en kiek wat Sanherib altmoal schreven het om joe, God dij leeft, te offrontaaiern!
17 Joa wis, HEER, keunenks van Assyrië hebben aal aander volken en heur laand verdisterwaaierd.
18 Heur goden hebben ze in t vuur smeten: t wazzen ja ook gain goden, mor aans niks as n fertuut van menskenhanden, holt en stain, dij ze vernaild hebben.
19 Mor, HEER, ons God, verlös ie ons oet zien greep, dat ale keunenkrieken van eerde erkennen zellen, dat ie, HEER, allenneg God binnen."
20 Dou luit Jesaja, zeun van Amos, tegen Hizkia zeggen: "Dit zegt de HEER, God van Israël: Ik heb t gebed over Sanherib, keunenk van Assyrië, heurd.
21 En dit is wat ik, de HEER, over hom te zeggen heb:
Zai het joe niks in reken,
zai het de gek mit joe,
dochter Sion;
achter joen rug om
schudt zai kop,
dochter Jeruzalem!
22 Wèl heb ie bespot en belaidegd,
tegen wèl joen mond openscheurd,
noar wèl hoogmoudeg t oog opsloagen?
t Is de Haailege van Israël!
23 Deur joen knechten haar ie spot mit de HEER.
Ie zeden: 'Mien striedwoagens
brochten mie op hoogste baargen,
in de verste oethouken van de Libanon.
Zien hoogste cederbomen kapte ik om,
zien beste ciprezzen.
Ik dring deur tot in zien verste schoel,
tot in zien dichtste bos.
24 Wotter van vremde landen
heb k aanboord en dronken.
Ale wotterlopen van Egypte valen dreug,
as ik ter mien vout op zet.'
25 Mor heb ie t den nooit heurd?
Al van olds heer heb ik t toumoakt,
in laankmanstied heb ik t beschikt,
ik, de HEER.
Mor nou gaait t ter heer!
Ie mozzen staarke steden vernailen,
der dikke puunbulten van moaken!
26 Inwoners stonden befoezeld en beschoamd,
en haildaal machteloos;
ze wazzen as gewas op t laand,
as jonk gruin, as gras op t dak,
verschruid nog veurdat t opkomt.
27 Of ie nou stoan of zitten,
goan of kommen,
ik bin der mit bekend.
Hou of ie tegen mie tekeer goan,
ik wait ter van.
28 Omdat ie tegen mie tekeer goan binnen,
om joen gebeer dat mie in oren klinkt,
sloag ik joe n ring deur neus,
en leg joe n bit in mond.
Doar breng ik joe mit weerom,
t pad doar ie langskommen binnen!
29 En veur joe, Hizkia, zel dit t taiken wezen: dit joar zel ie t nog doun mouten mit wat ter overblift op t laand, ankom joar mit wat vanzulm opkommen is, t daarde joar kin ie weer zaaien en mennen, droevetoenen aanplanten en vrucht ter van eten.
30 Wat spoard blift van t hoes van Juda, dij rest zel weer worrel zetten van ondern, en vrucht droagen van boven.
31 Want oet Jeruzalem vandoan komt n rest, van baarg Sion komt wat spoard is: ofgunstege laifde van de HEER zel dit doun.
32 Doarom, zo zegt de HEER over keunenk van Assyrië: Hai komt dizze stad nait in, gain piel schut e op heur òf, gain schild komt ter in de buurt, gain waal smit e tegen heur op.
33 t Pad doar e langskommen is, keert e ook weerom en dizze stad komt e nait in, zegt de HEER.
34 Ik zel dizze stad beschaarmen en bewoaren, om miezulm en om David, mien knecht!"
35 En wat gebeurde der? Aigenste naacht nog trok engel van de HEER der op oet en muik in t leger van Assyrië honderdvieventachtegdoezend man dood; aanderdoagsmörgensvroug laggen der aans niks as lieken.
36 Sanherib, keunenk van Assyrië, brook t beleg op, keerde weerom noar zien laand en bleef in Nineve.
37 Op n keer, dou e op knijen goan was in tempel van zien god Nisroch, muiken Adrammelech en Sareser hom dood mit t sweerd; zulm ontkwammen ze noar t laand Ararat. Zien zeun Esarhaddon wer keunenk in zien stee.
|
